Ángeles Fernández: “consideramos que debemos formar parte dunha federación específica de autismo”

Imprimir
Escoita este artigo

 

Con motivo da creación de Capaces Lugo e da súa integración na Federación Autismo Galicia, falamos coa presidenta desta asociación e nai dun neno con TEA, Ángeles Fernández.


Cal é o nome completo da asociación e por que o elixiron?

Chamámonos Capaces Lugo, Asociación de Apoio ás Persoas con TEA e Trastornos da Comunicación. Queriamos que fose o fiel reflexo dos nosos obxectivos e do que queremos mostrar sobre o TEA e decidimos o nome de Capaces, porque pensamos que os nosos fillos son capaces de facer moitas cousas. As súas limitacións son coñecidas e mitificadas e non se coñecen as capacidades que eles teñen, todos teñen algo no que destacan ou que te sorprende. Cando cres que non aprenderán, ves que con traballo, paciencia e moito amor todo se pode conseguir.

 

Como decidiron formar a asociación? Que necesidade os impulsou?

Decidímolo un grupo de pais porque víamos que en Lugo non existía unha asociación que cubrira todas as nosas necesidades que como pais tíñamos e tamén os nosos fillos. A idea é que a través da nosa asociación logremos completar e cubrir esas necesidades.


Que tipo de servizos vai ofertar?

Nun principio, o que queremos ofertar é información ás familias sobre todos os recursos existentes e sobre os dereitos que teñen os nosos fillos.

Información e derivación a diferentes terapeutas que traballan cos nosos fillos, xa que dende Capaces Lugo cremos, polas experiencias que tivemos, que non é necesario contratar terapeutas de maneira fixa para a asociación, porque adoita ocorrer que estes acomódanse e mesmo nalgún caso perden a motivación. Non en todos os casos dende logo, pero é a experiencia que vivimos e que queremos evitar. Temos un amplo abanico de profesionais autónomos que fan terapia a domicilio e en contornas naturais, xa que está demostrado que así xeneralizan mellor todo o que aprenden, comparando coas terapias de gabinete.

Tamén queremos ofertar apoio psicolóxico ás familias que acaban de recibir o diagnóstico; ter un grupo de pais de apoio para reunirnos e intercambiar vivencias que sempre son de moita axuda.

Crear unha escola de familias e ofertar obradoiros para pais, profesionais, irmáns, etc; tamén crearemos un programa de ocio para os sábados, fins de semana e vacacións.

Eventos para concienciar publicamente sobre o TEA e facelo mais visible e as cousas que nos vaian demandando os socios, xa que sobre todo queremos ser unha asociación democrática e que teña moi en conta a opinión dos socios. De feito, estamos xa facendo unha serie de obradoiros sobre o uso de tablets, e esto é só o principio.


Cal é o seu papel dentro da asociación e na formación da mesma?

O meu papel é o de representar á asociación, son a presidenta de Capaces Lugo. Fun a precursora xunto con Clara e Eva de crear unha nova asociación en Lugo e dispoño de mais tempo que as demais para adicarllo á asociación.


Por que decidiron solicitar o ingreso na Federación Autismo Galicia? En que agardan que lles vaia beneficiar?

Decidímolo porque consideramos que debemos formar parte dunha federación específica sobre o autismo, porque xa leva moitos anos traballando e mellorando a calidade de vida das persoas con TEA e temos os mesmos fins.

Agardamos beneficiarnos de todo o que nos oferte como pode ser axuda técnica, formación de obradoiros, información actualizada sobre lexislación e dereitos, programas de ocio e respiro familias, apoio ante as institucións e calquera consulta que lles poidamos facer.


Como poden dirixirse á asociación as persoas interesadas?

Aínda non temos sede física. Mentres tanto, dispoñemos de socios colaboradores que nos ceden espazos para reunións e realización de obradoiros, como é a tenda "Wip" dirixida por Pilar Ónega, unha muller moi comprometida coas asociacións coma a nosa, e tamén "Aupa", un centro de terapia integral infantil dirixido por Ana Somoza que non só é a terapeuta dalgúns dos nosos fillos, senón unha amiga e persoa comprometida coa asociación.

Dispoñemos de páxina nas redes sociais e do blog capaceslugo.blogspot.com, e é que hoxe en día coas novas tecnoloxías é mais fácil e práctico reunirnos de xeito "virtual" e estar en contacto a través dun correo electrónico no que se poden dirixir a nós e que consultamos diariamente, que é Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo .


Por Andrea Villarino Rúa

Este sitio utiliza cookies para mellorar a experiencia do usuario. Se non cambia a configuración do seu navegador, Vostede acepta o seu uso. + INFO.