autismogalicia.org

  • Increase font size
  • Default font size
  • Decrease font size
  • Español
  • Galician (Galego)

Novas

Autismo Galicia celebra a súa asemblea anual

Correo-e Imprimir PDF

A Federación Autismo Galicia ven de celebrar o pasado día 20 a súa asemblea anual na que se aprobaron o plan de acción e os orzamentos para 2013.

De cara ao vindeiro ano, a Federación plantéxase retos como a reorganización das áreas que conforman a organización co obxectivo de dar unha maior prioridade á atención das familias e ás persoas con TEA nos distintos servizos: atención directa e apoio, ocio e respiro familiar ou formación e emprego. Quérese facer especial fincapé na área de comunicación como ferramenta fundamental da entidade para a súa comunicación co colectivo, con outras organizacións e co conxunto da sociedade. Estas metas establécense nun contexto difícil e cun orzamento reducido, o que fai que se consideren novas fórmulas de financiamento e prestación de servicios na busca dunha maior eficiencia.

No seo da asemblea houbo tempo para reflexionar sobre o futuro e as novas tendencias do asociacionismo, a posición de Autismo Galicia dentro do terceiro sector e o comportamento e necesidades das familias con nenos e nenas con TEA. Neste senso a Federación considera que é preciso avanzar en consoancia con estas necesidades e traballar para que os servizos que se ofertan estean adaptados á realidade das familias.

Os membros da asemblea tamén tiveron oportunidade de seguir a evolución do estudo que se está a desenvolver na Federación sobre a prevalenza dos TEA no territorio galego. Esta investigación, que se atopa na súa última fase de recollida de datos, verá a luz no primeiro trimestre de 2013.

icon Plan de acción e orzamentos 2013

O CERMI califica 2012 coma un "ano horrible" para a discapacidade

Correo-e Imprimir PDF

O Comité Español de Representantes de Persoas con Discapacidade (CERMI) fai balance deste ano 2012 a piques de rematar e califícao de “horrible” polas agresións aos dereitos das persoas con discapacidade.

Os efectos da crise económica poñen en grave risco os niveis de benestar logrados nas décadas anteriores e dificultan aínda mais a inclusión das persoas con discapacidade na sociedade. Programas de axuda consolidados durante anos vense agora en perigo e as novas iniciativas están totalmente paralizadas.

Desde o CERMI destácase que “non houbo unha vontade deliberada de debilitar especificamente as políticas de discapacidade, e de feito a interlocución e o diálogo político manteuse nun grao aceptable, fluido mesmo”, sen embargo, non se logrou evitar a repercusión das medidas de axuste neste colectivo.

Este comité esixe tamén ás Administracións Públicas que poñan en marcha medidas que supoñen costes mínimos e que axudan a producir un cambio social en favor dos dereitos e da inclusión das persoas con discapacidade, o que denominan como “a axenda amable”.

 

Fonte: CERMI

ASPANAES e Fundación Menela colaborarán nun estudo de Ángel Carracedo

Correo-e Imprimir PDF

O Doutor Ángel Carracedo contará coa colaboración de familias de ASPANAES e da Fundación Menela para o seu novidoso estudo sobre as causas xenéticas do autismo. Co obxectivo de explicar ás propias familias en qué consistirá a súa aportación, Ángel Carracedo ofreceu dúas charlas en Vigo e A Coruña, onde tamén presentou os avances mais recentes na investigacións das causas xenéticas do autismo.

O estudo, pioneiro no noso país, tentará desentrañar un dos factores que provocan os trastornos do espectro do autismo, o xenético. Levarase a cabo na Fundación Pública Galega de Medicina Xenómica co apoio do SERGAS e da Fundación María José Jove e contará coa colaboración de familias galegas con nenos con TEA, que pola súa participación obterán un estudo xenético persoalizado e recibirán asesoramento no caso de necesitalo.

Sendo un dos científicos investigadores mais importantes de Galicia, o Doutor Ángel Carracedo dirixe a Fundación Pública Galega de Medicina Xenómica, onde se realizará o estudo; un centro ao que recorren investigadores de todo o mundo pola tecnoloxía propia coa que traballa.

A Asociación de Pais e Nais “Os Mecos” organiza un mercadiño benéfico

Correo-e Imprimir PDF

Durante os días 21, 22 e 23 de decembro, a Asociación de Pais e Nais “Os Mecos” organiza unha venda benéfica de artigos de segunda man nas instalacións da Fundación Fexdega en Vilagarcía de Arousa.

Neste mercadiño, pódense atopar todo tipo de obxetos de segunda man en bo estado como roupa, xoguetes, bisutería ou artigos de cerámica e artesanía.

Os beneficios desta venda serán destinados ás actividades de ocio e respiro familiar organizadas pola Asociación “Os Mecos” como talleres ou a ludoteca. Ademais de contribuir ao labor da asociación, as persoas que se acheguen poden atopar un regalo especial e distinto para este Nadal.

O mercadiño está aberto dende o día 21 ata o día 23 de decembro de 10 a 14 e de 16 a 21 horas na Fundación Fexdega en Vilagarcía de Arousa.

Autismo Galicia únese á Autismo España para denunciar o tratamento mediático do sucedido en Connecticut e a súa relación coa síndrome de Asperger

Correo-e Imprimir PDF

Desde Autismo Galicia queremos expresar o nosa total desaprobación ante as asociacións que os medios de comunicación están a establecer entre o asasinato de 27 persoas en Connecticut (Estados Unidos) e a síndrome de Asperger.

Moitos medios fixéronse eco das suposicións de veciños e coñecidos que suxeriron que o autor da masacre tiña esta síndrome, prescindindo dun diagnóstico especializado e dando cabida a todo tipo de rumores sobre condutas violentas nas persoas con trastornos do espectro do autismo.

Non existen datos que proben unha relación entre o autismo ou a síndrome de Asperger e actos de especial violencia. A publicación de informacións non contrastadas sobre este tema provoca a continuidade dos mitos asociados ao autismo e dificulta gravemente o traballo de integración levado a cabo por asociacións e familiares de persoas afectadas por este tipo de trastornos.

Desde Autismo Galicia apoiamos o manifesto de Autismo España e pedimos aos medios de comunicación responsabilidade no tratamento deste tipo de información e que se consulte a especialistas na materia para asegurar a calidade e a veracidade na información.

icon Comunicado de Autismo España sobre el caso Connecticut

Páxina 43 de 54

Este sitio utiliza cookies para mellorar a experiencia do usuario. Se non cambia a configuración do seu navegador, Vostede acepta o seu uso. + INFO.