A Federación Autismo Galicia é centro colaborador do Servizo Público de Emprego de Galicia en materia de información, orientación e busca de emprego e as súas actuacións, voluntarias e gratuítas, diríxense a mellorar as posibilidades de integración laboral e social das persoas con autismo ou outras discapacidades, que estean inscritos como demandantes de emprego.

As accións levadas a cabo dende o servizo de orientación laboral están baseadas na consideración dos aspectos persoais e do entorno das persoas con discapacidade, individualizando e personalizando o asesoramento en función das necesidades particulares de cada persoa na súa busca activa de emprego, e favorecendo as súas posibilidades de inserción no mercado laboral nas condicións máis acordes coas súas propias capacidades e intereses persoais.

A metodoloxía de traballo desenvolta polo/a técnico, dende o servizo de orientación laboral, atende aos seguintes aspectos:

• Tratamento da demanda: Realización de entrevistas personalizadas aos demandantes de emprego co obxecto de elaborar unha diagnose individualizada sobre o seu perfil, as súas necesidades e as súas expectativas.
• Información: Proporcionar información a cada usuario sobre os servizos que presta o Servizo Público de Emprego de Galicia, o mercado de traballo, o apoio ás iniciativas emprendedoras, a oferta de accións formativas para o emprego, os incentivos e medios dispoñibles para o fomento da contratación, o proceso de recoñecemento sobre as competencias adquiridas a través da experiencia laboral, os métodos e técnicas de busca de emprego, etc.
• Orientación: Deseño, elaboración e realización de itinerarios individuais e personalizados de inserción adecuando os intereses e motivacións do demandante á situación actual do mercado de traballo, mellorando de este modo a súa empregabilidade.
• Busca de emprego: Contacto con empresas para difundir información sobre as súas iniciativas para facilitar a inserción laboral.

Máis información: http://emprego.xunta.es/cmspro/contido

Servizo de Sensibiliación e Difusión

"Temos que aprender a ver o mundo a través dos ollos dunha persoa con autismo. Cando sexamos quen de comprender por que a vida lles resulta difícil, poderemos mover obstáculos e xerar respecto polos esforzos que fan para sobrevivir entre nós".
Theo Peeters.

A Federación Autismo Galicia traballa pola sensibilización e difusión dos trastornos do espectro do autismo como diagnóstico asociado a unha persoa que vai a desenvolver unha serie de características, que non sempre son coñecidas e moitas veces son obxecto de prexuízos, e que forman parte da súa diversidade como ser humano.

Que son os trastornos do espectro do autismo?

Cal é a especificidade dunha persoa diagnosticada de autismo?

Como podemos contribuir á súa plena integración social?

É preciso explicar para integrar, superar os temores asociados ao descoñecemento e facelo dende unha perspectiva positiva e aberta a novos conceptos. As persoas con discapacidade, con trastornos do espectro do autismo, son cidadáns cos mesmos dereitos e deberes que o resto de cidadáns que compoñen a sociedade diversa e plural, por eso, a súa integración debe ser efectiva dende os primeiros recursos aos que ten acceso: educación, sanidade, emprego, ocio, etc. Autismo Galicia traballa por sensibilizar e difundir estes conceptos e as posibilidades que existen para contribuir, de xeito positivo, á integración e desenvolvemento pleno da persoa con autismo como cidadán.

Campañas de sensibilización: “O Paciente con TEA na consulta”.

• Protocolo Sanitario para pacientes con Autismo (Galego).
• Decálogo de para pacientes con Autismo (Galego).
• Recomendacións para a atención sanitaria aos pacientes con TEA e Trastornos asociados (Galego).

Campaña de sensibilización: “coñece a rede de servizos para os TEA en Galicia”

• Difusión da rede de servizos nos Concellos de Galicia.
• Difusión da rede de servizos nos Centros Educativos.